குற்ற சம்மதம்

குற்ற சம்மதம்

கொலையொன்று செய்தேன்
பல நாட்களாய்
கதவு கட்டளை
புத்தகம்
படுக்கையறை
பேதமின்றி
கண்ணுக்குத் தெரியாது
ஓடிக்களித்தும்
கருவண்ணக் கழிவுகளை
மனம்போல் விதைத்தும்
பற்களின் பதிவுகளை
அழுத்தமாய் பதித்தும்
போக்குக் காட்டிக்கொண்டிருந்த
உனக்கு
கருணைக் கொலைக்குத் தந்த
மணம் கமழும் கேக்கை
ஆன்மாவில்
தேக்கி வைத்திருக்கிறாயா
என்னருமை மூஷிகனே
வரும் பிறவியில்
திருப்பித் தந்திட

முழுமையை நாடி

முழுமையை நாடி

உள்ளுருகும்
பண்ணை செவிமடுத்து
மனம் நெகிழ்ந்து
இசைக்க நினைக்கையில்
படைப்புத் தினவின்
சிகரத்தின்
அற்புத உருவை
எழுத்தாணி வழி
வார்த்தையாய்
வடிக்கையில்
உலக மகா தத்துவங்களை
காலம் காலமாய்
கண்டெடுத்து
கடைந்தெடுத்து
ரத்தினச் சுருக்கமாய்
உரைத்திட
குரல்வளையில்
கொணர்கையில்
.............

மாறாட்டம்

மாறாட்டம்

யாராரும் அறியாது
கடைசி வரிசையில்
கூட்டத்துடன் கூட்டமாய்
நின்று செல்ல வந்தவனை
கைப்பிடித்தழைத்து
மேடைக்கு
இட்டு வந்ததும்
உள்ளுக்குள்
ரீங்கரித்த
அதே கேள்வி
ஆள் மாறிப்போச்சோ

ஒரே பால் மணம்

ஒரே பால் மணம்

இவ்வுலகில் வாழ்கையில்
பரஸ்பரம் குதறிக்கிழித்துக்
கொண்டிருந்தவர்கள்
சாவூர் சென்றதும்
ஒன்றாய் இணைந்தனர்
முறைப்படி
ஒரேபால் மணத்திற்கு
தடையுத்தரவு இல்லையாம்
அங்கே

வந்த சுவடு தெரியாமல்

வந்த சுவடு தெரியாமல்

ஆர்ப்பரித்து வந்த
எதிர் காற்றினில்
அடிபதறாதிருக்க
அழுத்திக் காலூன்றிய
கட்டங்கள் கணங்கள்
இல்லையென்பதில்லை
இருப்பினும்
இப்போதெல்லாம்
வந்த சுவடு தெரியாமல்
போய்விடவே ஆசை

இலை உதிர் காலம்

இலை உதிர் காலம்

பஞ்சு போன்ற கால் பதித்து
மெல்ல அணுகிடும்
சரத்கால கொழுந்துகள்
தளிர்த்திட
இதயமெனும்
இகலோக விருட்சத்தின்
இலைகள்
கருகிச் சருகாகி
உதிரச் செய்திடவும்
மீண்டும்
தளிரிட்டுத் தழைக்கவும்
செய்திடும்
விந்தைகள் வினைகள்
காலம்காலமாய்
களைக்காமல்
நிறுத்தாமல்
செய்துகொண்டிருக்கும்
நாயகனே
உன் பாதம்
சரண்

மிரட்டல்

மிரட்டல்
கண்ணே
கோயில் பிரகாரங்களில்
புகை,பேசும்,வரைப்படங்களில்
நிஜ உருவில் கூட

தலையும்
முலையும்
யோனியும்
ஒன்றிணைந்திருக்கும்
அம்மணமும்
முழுவடிவில்
அழகுதான்
அதுக்காக
ஒவ்வொன்றாய்
முழுசாய்
மொண்னையாய்
தூக்கிக்காட்டி
மிரட்டலாமா